放工後的 .... 樂園

平時放工咁攰, 食飯都想搵個Relax 既地方。今次搵左間餐廳 <<樂園>> 位於尖沙咀, 地點就腳, 而且一出isquare出口就係, 對路癡既我都完全無難度。一入到去就會見到大大個彩虹係牆上, 裝修好colorful, 整體感覺幾開心。

未食野之前就叫左野飲先, 我地叫左一杯九重天同一杯紫醉金迷。紫醉金迷係黑加侖子椰果梳打。我自己就中意九重天多d, 佢係芒果草莓梳打, 草莓漿分開上, 可以自己控制甜度。

係小食餐牌見到有芝士焗有機大傘菇, 一定要食!!! 之前係青衣戲棚見過類似既食物, 可惜賣曬無機會試, 今次可以滿足返我食大傘菇既願望。個菇顏色好靚, 而且入口好滑, 一d都唔會乾, 面層有熱辣辣既芝士, 幾香濃。而另一個小食香草牛油帆立貝就不過不失啦。

終於到我期待既主菜喇 ~ 香煎鵝肝黑松露意大利飯。意大利飯上有一塊半隻手掌咁大既鵝肝同一匙黑松露。平時食黑松露飯都係多多飯少少松露, 呢間飯同松露既比例就岩岩好。意大利飯既份量好多, 建議多人Share, 唔係就試唔到其他野架喇。而鵝肝味道香濃, 如果再煎返軟多少少就perfect! 另一個主菜係厚燒美國安格斯肉眼扒, 肉味好濃, 肉汁鎖曬係扒入面, 如果可以加少少伴碟去下油膩感就更好。

登登登登! 呢個成個頭咁大既就係怪獸雪糕, 一拎出黎即刻成為全場焦點, 有成6球雪糕, 底層就有香蕉、Cream、棉花糖同可可脆片。怪獸雪糕可以當做生日蛋糕, 仲會送張即影即有連卡, 可以即刻寫字同畫畫。

食完我地無即刻走, 因為樂園無限用餐時間, 提供大量board game比客人玩, 有D似韓國cafe。Game既種類都算多, 有大富翁、層層疊、UNO等大家熟悉既遊戲, 連高登神獸卡都有, 輕輕鬆鬆咁玩下Game就消磨左一個晚上。

餐廳: 樂園 Happyland
地址:  尖沙咀北京道65-69號環球商業大廈2樓205-06室

Facebook:  https://m.facebook.com/story.php?story_fbid=10153301340445749&id=690700748
ig:  https://www.instagram.com/p/-LgWU5JAp0/