openrice 第一位, 浪漫燭光晚餐 ----------The Oyster House

每年聖誕節, 男朋友都會神神秘秘, 唔肯同我講去邊度食飯。
今年淨係叫我係灣仔等, 拖住我行行下入左一間西餐廳。
一坐低, 男朋友就同我講話呢間係近期openrice第一位!!!
拎得第一位, 質素肯定有保證啦~

 餐廳既環境都幾浪漫, 適合情侶黎燭光晚餐。  

頭盤係睇openrice食家推介既海膽紅蝦, $88/ 隻。

初時我仲諗成$88一隻蝦都幾貴, 食完之後我就明點解佢值咁既價錢。
小小的一匙, 有肥美既紅蝦, 配上一大片新鮮海膽, 一入口已經有滿滿的鮮甜。

我要再重覆講佢既海膽係甜得黎帶點海水味, 絕無半點腥或苦。

平時我係絕對唔會食三文魚子, 因為每次食都好腥, 連去日本築地食過都係。
但今次唔覺意食左, 竟然唔抗拒, 仲為個紅蝦添上左少少既魚油香。
加上青瓜既清新, 好開胃呢~

再來一個seafood platter, $199。
有兩隻生蠔, 兩隻螺, 一隻帶子同一隻磯煮鮑魚。

生蠔新鮮, 味道都鮮甜, 不過好細隻, 唔夠喉。
帶子同螺就一般水準無咩特別。
但食到鮑魚果時, 真係有驚喜。
上菜時, 已經好細心咁將鮑魚分左3件, 方便可以share。

鮑魚味道極甜, 口感軟滑, 烹煮既程度岩岩好, 少有seafood platter可以有咁高水準既鮑魚!

因為我地兩個都好鐘意食生蠔, 淨係seafood platter果兩隻點夠丫~
所以再order左8隻生蠔。 兩隻美國既Willapa Bay, 估吾到咁重蠔味, 以為咁平一定好流。

帶子位甜, 餐廳都幫你界好左, 所以一啖就可以食。 質地好爽身, 價錢仲係最低, 抵食。

另外兩隻Rollex,  比較creamy D, 甜味重帶少少奶油香。 不過我個人偏好海水味重, 所以都係再食下一隻 Gillardeau.  Gillardeau叫左4隻, 佢係近幾年既法國名牌生蠔, 基本上次次食蠔都叫佢, 海水味同甜味都岩岩好, 好滿足!

而家仲有優惠, 只要惠顧兩杯餐酒(每個客人計)，任何生蠔都有六折優惠, 好酒既朋友就最岩。

終於黎到主菜, 我地兩個都要左炭燒美國安格斯肉眼扒 ($298)。 牛扒肉質嫩滑, 肉味香濃, 而且肥瘦岩岩好。 最吸引我既係個醬汁, 因為佢用左肉汁加黑松露調製, 勁香!!

本來想試埋甜品, 不過真係太飽, 唯有下次再試~
總括黎講 The oyster house食物質素高, 價錢以呢個質素黎講唔算貴, 好適合情侶紀念日黎浪漫一下。不過提提大家上菜時間真係有D耐, 所以要有心理準備呢!

<< 方便電子落單放題 ------- 瀛川 >>

今次受到呢間放題{瀛川}邀請去試食。 為食小情侶梗係要去一試究竟。

我地七點九左右入到餐廳，餐廳入面已經坐左大概3分2既客人，不算太多人，但稍嫌坐得有點擠迫。 一坐低諗住好似出面D放題咁，拎D紙睇下有咩食。點知搵左好耐都搵唔到，問一問侍應先知道原來佢地呢度係用tablet黎落單，唔洗寫紙。 既環保又唔洗特登搵個侍應過黎比落單紙佢。平時放題搵人收紙等好耐, 電子落單呢樣抵讚!!!

睇下食物既種類, 刺身,壽司,軍艦,一品料理, 煮物, 天婦羅等大路既選擇都有。不過每一個種類既選擇都不算多。

食放題第一樣食既梗係刺身，叫左三文魚,吞拿魚,甜蝦,同帶子。 三文魚睇個樣都知道非常肥美,咬落去充滿魚油香味!! 好食。 有頭甜蝦非常大隻而且味道好鮮甜。 但係吞拿魚真係同出面大部分放題一樣，有雪味同有D鞋!!! 帶子就不過不失。

呢度令我驚喜既就係有海膽軍艦任食!!!!! 我地兩個都非常鍾意食海膽，即刻就叫左6舊海膽軍艦黎滿足一下。可惜海膽唔甜,  但唔腥。因為味道唔係特別好, 所以食左一次就算。放題任食都唔會預好好, 不過如果可以改善呢樣就更好喇!

之後叫左d壽司系列, 有創意壽司: 黑松露帶子同黑松露油甘魚壽司。 呢兩款黑松露系列既壽司黑松露既味道好重而且非常香, 推介。

串燒亦都係放題既亮點之一, 叫左海蝦，多春魚，雞翼同蕃薯仔。 海蝦大大隻而且用鹽燒既做法，新鮮又食到食材既原味, 所以係點左好多次!! 多春魚都好食, 燒得岩岩好, 唔會有苦味。 雞翼同蕃薯仔是一般水準無咩特別。

另外, 係放題入面我次次都會食既一定係蒜片炒牛肉/牛柳粒。我搵左好耐都搵唔到,我仲諗緊唔係呢d基本野都無啊嘛。 原來佢歸類左係鐵板燒入面，鐵板燒入面可以自己選擇材料，中意食咩就揀咩，落好單就會炒成一碟比你。我地揀左菇同帶子, 帶子好大粒!!!
上枱既時間熱度足夠，非常香同惹味!! 但係一定要趁熱食，凍左味道真係大打折扣!!!

放題既甜品係雪糕, 自己去雪糕櫃拎!!!
總括黎講, 佢係銅鑼灣既放題價錢黎講,屬於中等水平,   想試下方便電子落單服務, 又中意放題有多D壽司既朋友可以試下! 

《Relaxing Lunch-------Trafalgar》

平時都好少過港島，今個星期過會展工作，
跟老闆去左灣仔呢間餐廳lunch.


呢間餐廳既設計係bar既形式, 有好多電視直播球賽，仲有得玩卓球同掉標。Trafalgar有好多酒既選擇，好多Cocktail同啤酒種類，如果中意中午relax下，飲下野輕鬆下既朋友就岩曬。唔好酒既朋友 （例如我），可以試下鮮果沙冰，果味好香又唔會太甜。


雖然係一間bar, 但野食方面都好吸引， 有英式fish and chips，cheese burger同各種扒、意粉、意大利飯同小食。

我試左Ribs。平時食ribs會怕燒到好乾，D肉如果燒得老又會好難切。呢個ribs夠"林"，輕輕𠝹就已經切到。咬落好香好多肉汁。醬汁香辣又惹味，同事都切左我少少黎送酒。

卡邦尼意粉大推介！！！！ 好少食到卡邦尼意粉咁好食，個汁好濃但一D都唔會杰。食過好多卡邦尼都好快膩，但呢碟可以極速食曬又唔膩。配上煙肉同少少香草碎調味，岩岩好～


雖然Trafalgar既價格唔平，樣樣野食都百幾二百，但對平時lunch拿拿聲食個頹飯既我黎講，真係一個好relaxing既中午，一解工作壓力。間唔中食一餐貴少少慰勞下自已都係唔錯既。見到佢晚餐都似唔錯，下次要再試！


P.S 仲有食左蕃茄青口意大利飯，但唔好食所以連相都唔記得左影。


餐廳： Trafalgar

地址： 灣仔駱克道54-62 號博匯大廈5樓

海膽享當當 ----- 享丼丼日本料理

荃灣，一個好多美食既地方。主打既都唔係昂貴既餐廳，而係一些小本經營既餐廳。往往就係呢一類既餐廳，成日都比到人驚喜，所以我地成日係荃灣尋美食。日前又去左果頭"搵食"， 行下行下就去左華都商場，就係荃豐商場一直行過去，連住幾個商場都好多野食既其中一個商場。相信荃灣友都唔會陌生。

行過見到一個好醒神既餐廳名吸引住 （佢連住有兩間鋪，好易搵），{享丼丼} 個名真係夠哂霸氣。 係門口睇menu見到價錢唔算貴，野食又好似幾岩我地胃口，就試下。

 











坐低睇餐牌，侍應同我地講話做緊promotion只要like佢地facebook page就可以用半價優惠
叫一板海膽。原價98蚊既海膽49蚊就有一板。係$49 蚊啊！即刻叫左

我地心諗咁平會唔會好難食，始終海膽唔新鮮會又苦又腥架嘛 （您懂的）！
當我地食左第一啖，腦海前一刻既想法立即消失左。海膽明顯不是最佳既貨色，但係入口有海膽既甜味，而且一點腥味都沒有。以49蚊可以食到呢個質素既海膽，仲有咁大板，極抵！海膽旁邊有三塊青瓜，但我地建議就唔好咁伴海膽食。因為本身海膽味道唔算勁濃，加上青瓜會沖淡左。唯一可以改善既，如果將青瓜換左係紫菜就真係完美。

我地見到一個晚餐套餐，$85蚊有前菜，小食，主菜再加野飲。以日本菜黎講，可算係相當平。但最緊要既都係味道。

我地叫左兩個套餐，叫左 [牛肉稻庭烏冬] 同 [厚切三文魚刺身飯]， 前菜都係叫左雜錦刺身，感覺好似抵d。雜錦刺身有兩塊三文魚刺身，一塊八爪魚刺身，一條蟹柳加一粒帶子仔。

三文魚，無雪味，幾新鮮。 帶子仔雖然超細粒，但係味道都算鮮甜。而八爪魚同蟹柳一般貨色，不作評論。

[厚切三文魚刺身飯]：

有驚喜既魚生飯。 首先厚切既三文魚新鮮，豐富魚油香味。再來，當我地以為85蚊既刺身飯，只會係刺身放在白飯上就算，就錯了。 飯本身已加左醋，有微微既酸味，相當開胃。最驚喜既竟然加埋飯素落去，令成碗飯既味道又再提升左，相當惹味。呢一碗厚切三文魚刺身飯在最重要的刺身方面已經非常到位，再加上在細節亦有落足心機，抵讚。

[牛肉稻庭烏冬]：

首先一定要講下個湯底，湯底用既應該係醬油湯底，但飲落去唔會太咸，清清地感覺幾舒服。 牛肉份量激多，食極都仲有。佢用既係稻庭烏冬，煙煙韌韌，唔係平時果d cheap cheap烏冬。



而小食我地分別叫左[芝士孖寶]同[七味炸雞]。

先講芝士孖寶 ［圖下］ ，孖寶就係芝士春卷同芝士薯餅。
芝士春卷真係令人失望，原以為春卷入面既會係流心芝士。點知咬落去好似係包住芝士年糕之類既物體，無芝士之餘，口感亦不太好。相反，芝士薯餅就對板好多，芝士味非常香濃。
七味炸雞 ［圖上］： 炸雞唔鞋，可以接受。點上旁邊既蛋黃沙律醬可減油膩。

總括黎講，享丼丼的環境可以話一點日本餐廳既味道都冇。但係食物質素出色，在細節方面都有落足心機。睇得出係用心既小本經營餐廳。 宜家仲有promotion可以＄49食到一板質素不錯既海膽， 推薦比大家!!!!

餐廳： 享丼丼 刺身丼物直売
地址： 荃灣西樓角路170-184號